Turizmi shfaq shenja ngadalësimi, vetëm 0.4 për qind vizitorë të huaj më shumë në korrik

Turizmi në Shqipëri shfaq ngadalësim, megjithëse korriku shënoi rritje të vizitorëve dhe mbi 11.2 milionë turistë në 7 muajt e parë të 2025.

Turizmi në vend po shfaq shenja ngadalësimi, edhe pse edhe muaji korrik ka shënuar një rritje të numrit të turistëve krahasuar me një vit më parë. Sipas të dhënave të INSTAT, në harkun e shtatë muajve të parë të vitit 2025, në Shqipëri kanë hyrë mbi 11,2 milionë shtetas, një rritje prej 5,1 % krahasuar me vitin e kaluar. Këto shifra konfirmojnë se turizmi vijon të mbetet një motor i fuqishëm ekonomik, megjithëse struktura e lëvizjeve tregon se vendi duhet të orientohet gjithnjë e më shumë drejt diversifikimit të tregjeve turistike dhe të shërbimeve përtej sezonit veror.

Në anën tjetër, gjithnjë e më shumë shqiptarë po shfrytëzojnë sezonin e verës për udhëtime jashtë vendit, duke sjellë një rritje të ndjeshme të daljeve. Sipas të dhënave, gjatë korrikut në Shqipëri kanë hyrë 2.663.010 shtetas shqiptarë dhe të huaj, një rritje me 1,5 % krahasuar me korrikun 2024. Brenda këtij totali, 1.825.490 shtetas të huaj vizituan vendin, duke shënuar një rritje me vetëm 0,4 %. Kjo tregon se turizmi i huaj ka arritur një nivel të lartë stabiliteti, ku rritjet e forta të viteve të fundit po zëvendësohen nga konsolidimi i fluksit ekzistues.

Shqiptarët udhëtojnë më shumë

Në të kundërt, 837.520 shqiptarë u kthyen në atdhe gjatë këtij muaji, me një rritje prej 3,9 %. Ajo që bie më shumë në sy është fakti se edhe daljet e shqiptarëve nga territori kanë shënuar një rritje të fortë me 11,1 %, duke kaluar shifrën 782.849. Ky trend tregon një dinamikë të re të konsumit dhe udhëtimeve, ku shtetasit shqiptarë po shpenzojnë më shumë për pushime jashtë vendit, duke zgjeruar kështu edhe bilancin turistik të Shqipërisë jo vetëm në hyrje, por edhe në dalje.

Europa Jugore – burimi kryesor i vizitorëve

Nga ana e turizmit ndërkombëtar, 95 % e hyrjeve të huaja në Shqipëri vijnë nga Europa, çka e konfirmon rajonin si tregun kryesor të turizmit për vendin. Brenda saj, Evropa Jugore përfaqëson shumicën dërrmuese, me 68 % të hyrjeve, ndjekur nga Evropa Perëndimore (12 %) dhe Evropa Qendrore/Lindore (10 %). Ky përqendrim tregon se Shqipëria mbetet ende kryesisht një destinacion rajonal dhe mesdhetar, ndërkohë që tregjet e largëta (Amerika, Azia, Afrika) po japin vetëm një kontribut modest, megjithëse në rritje.

Biznesi po fiton terren në krahasim me turizmin klasik

Një tjetër element me interes është fakti se, ndonëse 99 % e hyrjeve të huaja janë për qëllime personale (turizëm, pushime, vizita familjare), hyrjet për arsye biznesi dhe profesionale janë rritur me 15,6 % në krahasim me korrikun 2024. Ky është një sinjal i rëndësishëm që ekonomia shqiptare po fiton gjithnjë e më shumë vëmendje ndërkombëtare edhe përtej turizmit sezonal, duke u shndërruar në një pikë takimi për aktivitetet profesionale dhe investime. /ekofin.al

Më të lexuarat